إلا إنني لم أملك ألا أتناوله نظراً لأنه يتضمن حالات بشرية موجودة وسطنا وبدأت تتردد بكثرة علينا، وانتظرت أن يتناولها بعضاً من زملاءنا بحيث أبقى بعيدة عن تناولها إلا أن ذلك يبدو أنه لم يحدث.

لذا بستأذنكم وأنا أعلم أنكم طلبتم ألا أتناول مشكلات جنسية صريحة في موقعي لكن قد تقتضي الأمانة عليَ هذا التناول لكن بالقدر الذي أسأل الله أن يوفقني في ألا يضايق قرائي الدائمين ومَنْ يعرفوني وأقدر أنهم يرغبوا في أن أظل لديهم محتفظة بصورة ذهنية معينة تشرفني وأجتهد في الحفاظ عليها، لكن ... ربما نضطر في حالات معينة أن نقول كلمة حق حتى لو كان شكل أدائها قوي وليس فج إن شاء الله .

هل يمكن أن يتزوج رجل وقدرته الجنسية ليست بكفاءتها؟!!!

دخل عليَ وقد دون على ورقة البيانات الأساسية التي ستطلب منه إسمه وعمره وعدة بيانات، وما أن دخل حتى دار بيني وبينه الحديث التالي :

قال : دكتورة السلام عليكم

قلت : عليكم السلام أهلاً وسهلاً إتفضل حضرتك

قال : ممكن قبل ما أتفضل أقول حاجة الأول وبناء عليها تقرري أقعد أو أمشي؟؟

قلت : إتفضل

قال : البيانات إللي قدام حضرتك مش صحيحة (مشيراً للورقة التي عبأها قبل الدخول لي) .

ضحكت ... ثم قلت له : الكثير من الناس بييجوا وبيمشوا بأسماء وهمية وبيانات مش صحيحة إتفضل حضرتك أقعد دي الدنيا إتقدمت وقت ما بدأت شغل سنة 1998 كان كل إللي بيجولنا مش بيقولوا بياناتهم الصحيحة ده إحنا دلوقتي إتقدمنا.

لاحظت أنه لازال متوتراً .. فأكملت حديثي حتى يجمع نفسه وقلت : ده حتى حضرتك كان بيجي بعض الفنانين عشان ولادهم وطبعاً الفنانين بقى بنكون عارفينهم ومع ذلك يقدم لك نفسه على إنه محامي مثلاً ويقول لك إنه في شبه من فلان .. فيعني إحنا متعودين.

أخذ نفس عميق ثم قال : ريحتيني لإني قعدت أفكر إيه التصرف البايخ ده يعني أنا هطلب منها تكون أمينة معايا وفي موضوع يهمني جداً رأيها فيه وقاطع كل الكيلوهات دي عشان أجيلها وأخدعها من أولها ؟؟؟ أنا أسف .

أنا إسمي ..... وعندي 35 سنة ... وبشتغل ..... وجاي لك من .......

قلت : ياااااااااااه ده فين على الخريطة ؟؟

ضحك ثم قال : في الدنيا الواسعة

ببساطة يا دكتورة أنا مُطلق من سنة و 29 يوم ، بعدهم طبعاً لإني بشكر الله كل يوم على أنه تم فهذا فضل منه.

وطبعاً ده مش عشان مطلقتي وحشة ولا عشان أنا ضحية بس عشان في حاجات لما بينقطع منها النصيب بيبقى أكبر خير وبركة يمدها لنا ربنا إن الحكاية تنتهي.

طليقتي كانت ست كويسة بس كانت بتحب كل حاجة تتعمل بالشكل إللي تشوفه، يعني عشان متربية بشكل عملي شوية فكانت كل حاجة عندها له متطلبات.

أنا كان عندي مشكلة في واحد من الموضوعات دي وهي العلاقة الزوجية الجنسية، أنا عندي عجز جزئي زي ما هي شخصتني هي طبعا مش دكتورة بس قالت إنها قرأت،لكن أنا الحقيقة تقدري تقولي إن الجنس عندي مش حاجة مهمة أوي، من الناحية الحياتية ومش قوي من حيث القدرة عليه، أنا ضغطي مش مظبوط من وأنا صغير نتيجة لمشكلة من الطفولة، ويمكن ده سبب إن معنديش قوة كبيرة في أداء الجنس، لكن الحمد لله كانت الدنيا ماشية وكنت بحاول أوفي بالأمور عند زوجتي السابقة بدرجة جيدة وإن كان ليس بالمرات التي كانت بتأكد لي إن أصحابها الأسوياء زي ما كانت بتسميهم بيقوموا بيها يعني أنا لو كانت العلاقة مرة أسبوعياً بالنسبة لي أو مرة كل عشر أيام بيكون مُرضي جداً بالنسبة لي.

لكن هي كانت بتعتبر ده جريمة قد يكون معاها حق، خصوصاً إنها كانت دايماً تقولي إن ده هو العامل المشترك الوحيد بينا، لإن الحقيقة هي لا بتحب القراءة ولا بتحب الكتابة ولا بتحب التأمل ولا بتحب كل الحاجات إللى أنا ممكن تحقق ليا متعة كبيرة.

حتى لو إتفقنا إننا نقضي وقت مع بعض، فلازم يكون في خناقة فأهلها كانوا بيسهلوا علينا الموضوع نروح سوا مثلاً شرم، أروح أنا على البحر أقعد أتأمل وأعيش مع المناظر الطبيعية أصور شوية أتفرج على الناس شوية ، أكتب شوية، هي في الوقت ده بتكون نايمة وبتصحى بالليل عاوزانا نروح ديسكو أو يعني نادي ليلي أو حاجة من الحاجات الصاخبة دي.

فطبعاً كنت بعمل ده بس وأنا مش مبسوط وكل واحد فينا مش لاقي حتى في وش التاني بتاعته، يعني عارفة مش بيقولوا إن كل واحد في البشر بيلاقي إنعكاس لصورته عند الأخر في جزء من ملامحه ؟؟

قلت : أه صحيح ده معنى ناس كتير مش بتعرفه

قال : لا يا دكتورة ما تقلقيش إللى قدامك ده قاري في كل الحاجات إللي إنتي بتحبيها، ولما بقرالك بحس إن تكوينا العقلي واحد، يمكن بس حاجات بسيطة مختلفة منها إني قرأت موقعك كله خلال شهرين وحاولت ألاقي حاجة دالة على إنك بتكتبي شعر ولا لأ فمالقتش فقبل ما أكمل بقى حضرتك بتكتبي شعر؟؟

قلت : توقفت كنت في الثانوي والحقيقة ما كانتش حاجات عاطفية ، كانت عن فلسطين حتى قبل أن أجمع صورة عن القضية، ون أحوال الناس لما كنت بلاقي صحباتي لما يتخانقوا ينسوا كل حاجة ويفضحوا أسرار بعض أويعني حركات الندالة بتاعت البنات وكل المواقف.

قال : عظيم .. كما توقعت .. المهم إن مطلقتي لم يكن بيننا أي حاجة من المشتركات ودائما ما تكرر مقولة كنت أقولها لها حين أصالحها لتعرف أنه لا ذني ولا ذنبها فكنت أقول :

إننا نفي للنفي في ذاته إثباتا ... فإن نحن حاولنا الإتفاق أصبحنا في حالة الإختلاف بذاته .. وعجبي !!!!

طبعاً ضحكت .. لإنه بيت معبر أوي عما يصفه.

إستطرد قائلاً ... إنفصلنا وبيننا ثلاثة أطفال، وسافرت هي لأهلها في ... وأصحت بشوف الولاد كل شهرين هي مرة ترسلهم على نفقتها وأنا مرة أستقبلهم على نفقتي .. طبعاً مش نفقتي أوي لإنها أخدت كل حاجة مني عشان تداري عليا أو هكذا تصورت لنفسها، لكن الحقيقة أنا مكنتش بفكر في حاجة فتنازلت عن كل شئ، وأصبح أبويا ربنا يديه الصحة هو المسؤل عن كتير من حياتي رغم عمري ده.

لا يهمنى الماضي يا دكتورة لإنه الحمد لله إتقفل بأفضل صورة ممكنة .

قلت : جميل ... وماذا عن الحاضر والمستقبل

قال : ده إللي جايلك علشانه ، الحاضر والمستقبل في .... (إسم سيدة) هي أصبحت كل النهاردة وحلم بكرة ، ويمكن مُطيب لجروح الماضي.

تعرفي يا دكتورة ؟؟

قلت : إتفضل

قال : أنا عمري ما عرفت أو إعترفت بيني وبين نفسي إني كان ناقصني كتير إلا لما عرفت البنت الجديدة دي، إللي ظهرت في حياتي بعد طلاقي بــ 16 يوم في واقعة غريبة جداً لما قرأت مقالك اللي سمتيه شخص يأتيك ليكتب لك شهادة ميلادك إللي السيدة فيه بتقولك إزاي الصدفة لعبت دور في مقابلتها بالراجل إللي عوضها حسيت إنك بتتكلمي عني ومن يومها قررت أجيلك.

البنت دي عندها 33 سنة تتمهم في مارس القادم إن شاء الله، لم أكن أتخيل بقى إن في بشر كده خصوصاً في النساء معلش يعني يا دكتورة بس خبرتي بالنساء خلتني أشوف إنهم عالم مضئ لا ينتعش إلا في صخب الأشياء لبس وفلوس وسفر وفسح وجنس وأصوات عالية يعني ...  المهم إن ظهور البنت دي عمل لي لخبطة، فبعد ما هزت مطلقتي ثقتي في نفسي من إن حالتي الجنسية مش على ما يرام رغم إن الدكاترة قالوا إنه صحيح في إنخفاض لكن في المدى العادي شوفي دي رسمة دكتور بإيده ومش أي دكتور ده فلان .... قال إن هنفترض إن الخط ده هو المدى الطبيعي إنت واقف على أواخره، وإن ممكن يحسن ده قبولك للست إللي معاك.

فأول ما شوفت البنت دي طبعاً ولا كإني موجود أساساً، وفضلت أتعامل معاها على إنها زميلة لما الشركة بتاعتنا حبت تعمل دهانات وتوضيبات عشان توريث بقى الشركة لإبن من أبناء الملاك الكبار لها فنزلوا الموظفين إللي كانوا في الدور الرابع عندنا في الأول .

وده كان قبل الثورة تقريباً بشهر ، يعني في ديسمبر الماضي، البنت محبوبة جداً وكان بيلفت نظري إنها ما إتجوزتش خصوصاً إنها متدينة ومخلصة في عملها لدرجة إن رئيس مجلس الإدارة مابيعملش حاجة إلا لما يقول لك راجعي المهندسة فلانة .

كنت وقتها ماشي جنب الحيط وخلاص أمي قالت لي مش عاوزين بقى جواز وأهو ربنا رزقك بالبنت والولد وعندك تلاتة إعتبر إن ده نصيبك من الدنيا، أمي تبلغ من العمر 77 سنة بس وتد يعني، فهي حست من كلام مطلقتي إن الدنيا عندي مش كويسة وأنا خجلاً يعني ما حبتش أفتح معاها وأوضح لها إن الموضوع مش كده، وقلت أنا كده كده مش هفكر ده أنا ما صدقت إختليت بنفسي إللي أعرفها.

أمي أكبر من أبويا بسنتين صحيح أيامهم مكانش في حد بيتجوز بنت أكبر منه بس جدي قال وحصل، وهي بتدي كلام صعب زي الصعايدة بس في الأخر هي خايفة على شكلي.

فضلت مع البنت دي على مدار السنة دي ما تعرفيش إيه إللي بيحصل بتخترقني كل يوم عن إللي قبله، وبقيت جزء مهم من حياتها، مش عايز أبالغ وأقول كل حياتها، لدرجة إني بقيت لو غابت عن التليفون ساعتين مثلاً أحسن إن لا قدر الله حصل لها حاجة.

فضلت ماسك نفسي عن إني أعترف لنفسي إني بحبها لغاية شهر مايو لما بدأت الدنيا في مصر تهدأ شوية ، وبدأ الصيف، لقيتها بتحجز كام يوم هتطلع فيها عشان ولاد أختها وبيقولولها يا فلانة طبعاً هتقفلي التليفون زي كل سنة ومش هنعرف نوصلك في الأجازة

ردت قالت : طبعاااااااا دي أجازة إنسوني بقى

أنا الحقيقة يا دكتورة مش عارف إيه إللي حصل لي حسيت بغصة في قلبي، 5 أيام هتقفل تليفونها ومش هعرف عنها حاجة؟؟ خمسة أيام إيه ده يعني إيه؟؟

وقتها ما تمالكتش نفسي ولا عرفت هو إيه إللي حصل إلا وأنا داخل عليها المكتب بقول لها 5 أيام تقفلي تليفونك وتتحرق الناس عشان تبقي إنتي في أجازة

طبعاً كنت عصبي جداً .. وتقريباً قعدت أهلفط في كلام كده وأقول لها يبقى ما نقولش للناس بقى إحنا موجودين وإحنا معاكم ، يبقى الواحد لازم ياخد باله بقى إنه موجود عند الناس طالما ظروفهم تسمح ..........................

عارفة إيه الغريب يا دكتورة وإللي خلاني جريت من مكتبها زي أي مراهق؟؟

قلت : إيه؟؟

قال : إنها وشها إترسمت عليه إبتسامة تخلي الأرض عندنا ما تحتاجش النيل يجري تاني لمدة سنتين كده تفضل مروية

قلت : عشان حسيت إن حس الأنثى عندها فهم إن ده حب ؟؟

قال : الله يرحم والديكي .. ده إللي حسيته .. فجريت على مكتبي، هي متدينة ومش بتدخل مكتب حد إلا لو في شغل وبتحافظ على شكلها ، فطلبتني في التليفون قالت أنا أسفة كنت بقصد إن مش هتلقى تليفونات شغل لكن كنت هديك تليفون شخصي عشان نتواصل.

حسيت وقتها إني حمار حصاوي بقى .. إني حاجة كده مش عارف أوصفهالك ، بس في المكالمة دي حسيت إني عايز أخدها في حضني وأقولها معلش أنا حمار أنا عايز أقولك إني بحبك أوي بس خايف عليكي إني ما أكونش الشخص إللي ممكن يناسبك

بكيت وقتها كتير لدرجة إن زميل شافني وعمل سياح كده وقال وبعتتلي رسالة رقيقة فاكر مش كلامها .. لا حروفها قالت فيها : مش هقدر أكون وسط الناس إللى حوليك دلوقت بس حاول تحس وجودي وتتأكد إني ببكي مثلك على الأقل لإني مش عارفة أكون معاك رفع الله عنك الغمة وحالاً سأتوجه للصلاة وأدعيلك.

خدت إذن من الشغل ورحت للحاجة أمي قولت لها إن دلوقتي بقيت في أمر واقع وأنا بحب البنت دي وشايف حياتي معاها إيه الحل أمشي وأسيب المحافظة وأعتبره إختيار ربنا؟؟

قالت الحاجة ... ما تروح تسأل حكيم .. بوست راسها وقعدت أبحث على النت لغاية ما جبت إيم أكبر أستاذ وإتصلت عليهم وكان في ميعاد بعد أسبوع أخدت الأسبوع ده أجازة حبايبي إتصرفوا لي عشان ما أشوفهاش وأوعدها بحاجة خدت القطار ورحت وفضلت أخد معايا السواق أو حتى أروح أنا سايق، قابلت الدكتور وشرح لي إن فعلاً أنا مش تمام أوي بس إن نسبة الرجالة إللي كده ومتجوزين وعايشين يمكن توصل لأكتر من 40 % .

قلت له في حاجة أعملها تاني عشان أطمن قال إن في خبير جاي الشهر الجاي أقدر أجي وأعرض عليه حالتي لو حابب أتأكد وهيكون معاه أجهزة حديثة.

حجزت للراجل ده وقولت لو حتى هايكلفني إيه، ورجعت البلد وقابلتها كانت هي بتتواصل معايا وكل إللي قالتهولي هو أنا عملت حاجة زعلتك ؟؟

على حظي أو تقديرات الله أول ما ارجع المكتب واحد يوسطني عشان أطلبهاله، ده كان تالت واحد يتكلم قدامي على إنه عاوز يتجوزها، فقولت هي موتة ولا أكتر رحت عشان أقول لها على العريس ده وأشوف يعني بصراحة يا دكتورة كنت رايح عشان أشوفها عن قرب كنت هتجنن إني بقالي أسبوع ما شوفتهاش وعايش في الدور وبرد عليها رسايل بس على إني تعبان فقولت أروح أبص في وشها وأملي عيني منه وأهو موضوع العريس حجة.

قلت : وهان عليك تقول لها على العريس؟؟

قال : الله يسامحك يا دكتورة .. والله زي ما يكون لساني إتشل .. وفجأة لقتني بحكي لها على الموضوع كله .. ايوة يا دكتورة ... كله

قلت : ومشاعرك ناحيتها؟؟

قال : كله يا دكتورة قلت لها إني من وقت ما شوفتها بأدبها وروحها وطريقتها وأنا كإني أول مرة أشوف ست .

قلت : ها ... وهي قالت إيه؟؟

قال : قالت جملة خلتني أحس بمسؤلية نحيتها أكبر .. قالت لما ربنا بيوزع الأرزاق على الناس بيدي المناسب .. يعني لما ربنا يقدر لحد حاجة وهو كل تكاله عليه بتكون الحاجة دي مهما كانت قليلة على مقاسه .. مش داليا الشيمي إللي إنت بتقرالها بتقول كده؟؟

طبعااااااااا أنا ضحكت

قال :أيوة يا دكتورة إسمك طالع في الموضوع أصل أنا بقرألك وببعت مقالاتك لصحابي يعني عشان الناحية الإسلامية كده مش بحب العلم ينفصل عن الدين.

بس فهمتي إيه بقى يا دكتورة من كلامها؟؟

قلت : إنها إستوعبت الحالة بتاعتك وبخجل البنات بتحاول بطريقة جيدة توضح لك إن الموضوع يمكن مش فارق معاها

قال : هو ده إللي وصلتهولي فعلاً وأنا لم لقيتها خجلانة قولت لها يا بنت الناس أنا عايزك تفكري وردي عليا في رسالة وأنا أدي حاجات الدكتور شوفيها وإعرضيها في المكان إللي تحبيه وعندي معاوده بعد شهر كده على أخر يونيو مع راجل أجنبي

فردت برسالة توضح فيها إن الحياة فيها أمور كثيرة وإن هي تنظر لأشياء أخرى في الحياة وإلا لو كان هذا الأمر هو الأساسي بالنسبة لها كانت إتجوزت خصوصاً إن مكانها والبلد اللي بنعيش فيها هي كده بالنسبة لهم مش كبرت ديه ماتت الله يسامحهم.

رحت للدكتور الأجنبي وقال نفس الكلام إني في أخر العاديين وقعدني مع حد قالي إن الجنس مش بس علاقة وقعد شرح لي وكده ما هو واخد مبلغ محترم فقعدني مع إتنين خبرا منهم واحد نفسي وقعد يكلمني عن أهمية التعامل الإنساني وبعض الحاجات المهمة زي مثلاً إن المقدمات مهمة وكل إللي في الإسلام عشان ما أطولش عليكي .

المهم يا دكتورة إننا من شهر يوليو إتفقنا على إن ربنا ييسر لنا مع بعض، وبدأنا نتعامل إنسانياً زي المخطوبين، وأمي فرحت رغم إنها كانت خايفة وبدأت في حيرة الماديات ما الست الله يسامحها قشطتني خالص خالص .. ومش عندي بيت ولا عفش وبتاخد نسبة كبيرة من راتبي بالعُرف كده عمها قعد وطلب وأنا ما أعترضتش وقولت ربنا يخلف علينا.

هي بقى مش فارق معاها حاجة عاوزة ناخد شقة في إسكان الشباب في المحافظة نواحينا ومش مهم هندخل بإيه ومجنناني يا دكتورة بتقول كلام مش معقول هي أبوها ميت وجوز أختها الكبيرة هو إللي مسؤل عنها، راحت طلبت منه إنه لا يتدخل في الأمور المالية في زواجها وراحت لشيخ عندنا سألته هل كده هي بتغضب الله إنها تطلب من الوالي لها إنه لا يتدخل في الأمور المالية، فقال لها لأ هذه أمورك وأنتي تحددي أي منها تتنازلي عنه.

هي عايزة على عيد ميلادها في شهر مارس نكون متجوزين وأنا كل إللى حيلتي وإللي فلت من طليقتي الله يسامحها 23 ألف جنية جمعية كنت دخلتها عشان حد عندنا يتجوز وخدت أخر إسم وعربيتي حتى عليها لسه قسط سنة يعني مش هعرف أبيعها والسواق أبويا إللي بيدفعه عشان شكلي وما يحسش الناس إن طلاقي خلاني على الحديدة.

مجنونة والله يا دكتورة تقولي نشتري أوضة نوم وإيجار قانون جديد ونتجوز وترجع تقولي مش داليا الشيمي بتقول ما نضيعشي فرصة نعيش سعدا عشان حاجات شكلية؟؟ طبعا يا دكتورة ما أخبيش عليكي مش عشان قعدتك قولت لها أنا هشيل لك النت خالص عشان تسيبك من داليا الشيمي ديه ... داليا الشيمي بتكتب عن الحب والكلام ده وتلاقي جوزها مليونير اللهم صلي على النبي وراكبالها عربية من سفر الخليج والكلام ده أد كام متر كده

طبعااااااااااا ضحكت ..

قال : لا مؤاخذة يا دكتورة ما هو داليا الشيمي كلامها حلو بس هي بردو الناس تعقلها طب إنتي معاكي عربية ماركتها إيه؟؟

قلت : مش بحب أتكلم في ممتلكاتي الخاصة الحقيقة يعني أتكلم عن أهلي عن طريقة حياتي لكن في حاجات أحب كده الناس تقعد تتخيلها زي ما حضرتك عملت.

قال : عشان الحسد يا ستي ربنا يبارك المهم البت دي أعمل فيها إيه؟؟

أنا خايف عليها دي بنت بنوت يعني ليها متطلبات إنتي فاهمة طبعاً ، فقالت لي طب إيه رأيك لو لسه خايف روح عند داليا الشيمي بما إنك كده كده بتنزل مصر وإسألها إيه رأيك فجيت لك وخدي بالك إنك مسؤلة قدام ربنا يعني لو إنتي قولتي إيوة .. خدي بالك لو قولتي إيوة يبقى على أول فبراير إن شاء المولى نعقد عشان نروح أنا والمجنونة نشتري العفش والجواز في مارس.

قلت : بعد رأي الأطباء طبعاً توكل على الله ، وخد بالك إن البنت بيتم تعويدها على طريقة الحياة في كل شئ، بمعنى إن معندهاش حالة معينة عاشتها فتقارن بيها عشان تعرف أقل ولا أكتر، ثم إنك قايل لها وهي مش صغيرة فهنقول إنبهرت بيك، ولا هي مش لاقية فهنقول إنك فرصة وأهي تلحق نفسها بالسكينة وخلاص، ولا هي حاجة سريعة، ولا هي مش متدينة فهنقول مش فاهمة لإن مستوى الدين إللى عندها زي ما إنت بتشرحه البنت فيه بتكون عارفة حد حتى النظرة على رجل أخر.

بس المشكلة ممكن تكون عندك إنت .. هل إنت مقتنع بكلامها؟؟

قال : أيوة تقصدي عشان الغيرة والكلام ده وإني أبقى خايف لحد تاني ونظام الأفلام ده؟؟

لا يا دكتورة والله .. زي ما إنتي قولتي الله يرحم والديكي هي متدينة وأنا ثقتي فيها بلا حدود وبعدين أنا عارف إني مش عاجز وبعدين متفائل إن الموضوع معاها هيختلف لإن حتى صوتها بيثيرني ولما بقعد معاها بكون والله عاوز أحضنها ولما بتكون معايا في المكتب بتعرض عليا درافت لحاجة وتمشي ببقى يعني أحس إني مسكت نفسي بالعافية عنها وبحاول ما ألمسهاش خالص لإني حس لو قربت مش همسك نفسي .

والغيرة بقى والله هي إللي بتغير موت يا دكتورة .. ده أنا بعاني وأقعد أضحكها وأقول لها على إيه ده إنتي فاهمة ده أنا بلعب في الضروري وبقول بس يارب أقضي ههههههههههه تقول ماليش دعوة أنا بغير على عنيك تشوف غيري وعلى ودانك أبصر إيه وعلى مخك يتخيل مش عارفة إيه حكي الستات بقى إللي إنتي عارفاه.

قلت : ربنا يوفقكم .. وتذكر إن الرضا لمن رضا .. وفي حاجات كتير ممكن المتجوزين يدوها لبعض يمكن يكون أخرها الجنس لكن للأسف حاولوا على مدار عقود كتيرة يخيلوا لنا إن هو ده الحالة الوحيدة للعطاء لغاية ما البشر صدقوا، واستسهلوا لإنك أسهل حاجة تعملها إنك تدي حد علاقة جسدية دقايق وتحس إنك كده سددت حسابك رغم إن العطاء القلبي والإحسان وحسن الرفقة والتفاهم والود كلها امور أصعب وأهم بكتير ..

كتير ستات عندهم غضنفر في البيت لكنه لم يحميها من حالة (العوز النفسي) كتير منهم يا أستاذ .... بيبقى نفسهم يتحضنوا ، نفسهم يحط إيده على شعرها إن شا الله وهو بيتفرج على حاجة، يحضنها من ضهرها وهي في المطبخ حتى لو مش هتكمل بحاجة، وللأسف الناس مش بتاخد بالها من ده أو زي ما قولتلك الحاجات دي بتتطلب مهارات أصعب من حركات عضلية جبلية تقوم عليها العلاقة الجنسية وليس معنى الإفضاء كما تحدث عنه ديننا.

تزوج فتاتك .. فإن كان الله قد وضعها في طريقك فستكون مناسبة إن شاء الله وشكر الله لك صراحتك لتكون تزوجت منك في حالة إختيار إن هي خدعت نفسها فتحمل نفسها وليس أنت.

وأنا لازلت أكرر  إن حرام نضيع دقيقة ممكن نعيشها في سعادة حلال عشان أي حاجة سواء أوهام في دماغنا أو عشان شكلنا قدام البشر وطبعاً ما تنساش تقول داليا الشيمي وزقت تقول زي ما تقول

قاطعني وقال : أعوذ بالله يا دكتورة أنا أقول داليا الشيمي والكلمة الوحشة إللي قولتيها دي لأ أنا قولت الصراحة يعني (البتاعة) داليا الشيمي دي تقول زي ما هي عايزة وبعدين قولت بقى عربيتها كذا وجوزها كذا .. لكن ما عاذ الله أقول زفت وأنا على طول بكرر كلامك؟؟

قلت : لأ أصل في فرق كبير بين زفت والبتاعة داليا الشيمي .. تكونشي رتبة جديدة بعد الثورة وأنا مش عارفة ؟؟

جلس يضحك كتييييييييييييييرا .. ودعوت له أن يتمم الله له وأن يساله التوفيق ، فصحيح يمكن أن نخطط جميعاً ونحسب الحسابات لكن لا تنسوا الله الذي أمره بين الكاف والنون فهو وحده من يقول كـــــــــــــــن فيكون ... بالله عليكم حاولوا تفحصوا مفاهيمكم عن كل جوانب الحياة فقد ظلمنا من قبلنا حينما رسخ لمفاهيم هي بعيدة عن أصل الإنسان كما فطره الله لأنني سأظل أصرخ وأقول أن ما أفسد حياتنا هو بعدنا عن الفطرة .. اللهم إجعلنا على فطرة الإسلام.

نسيت أقول لكم إنه قبل أن يتركني وبعد أن دعاني للفرح

قال : المسافر له دعوة أنا هدعيلك بس ما تريحيني وتقوليلي ماركة عربيتك أنا معايا تويوتا ياريس بتاعتك بقى أغلى ولا إيه؟؟ أصلي عاوز أروح البلد أقول لهم

قلت : وأنا شخصية عنيدة جداااااااااا لما بعرف أن حد عاوز يعرف حاجة مش بقول للأسف خلي بتاعة تنفعك أنا انشر مقال مكتوب عليا فيها بتاعة وأنا إللي بدرب ناس في مكان دولي ماشي

قال : لأ متقوليش ظل يضحك حتى خرج .............................!!!!!